fino' chamoru / kuttura / Uncategorized

FESTPAC Essay

Dispensa’ yu’ na kulan åpmam ti mångge’ yu’ guini! Gi må’pos na tiempon Fall, humålom yu’ gi nuebo na prugråmman Ph.D. yan kulan esta måtmos yu’ gi che’cho’-hu, lao un nuebo na semester på’go yan esta hu hula maisa yu’ na ti bai hu måtmos. Pues, para i fine’na na tinige’-hu tåtte, bai hu post este.

Esta ta tungo’ na u maila’ FESTPAC giya Guåhan gi Mayo. Manaplika yu’ na para bai hu delegate para ini na dinanña’ gi “Indigenous Languages.” Annai hu li’e’ i finaisen siha gi aplikåsion, hu hasso ya hu disidi na bai hu fångge’ i aplikåsion-hu todudu gi fino’ Chamoru. Anggen malago’ yu’ sumaonao komu delegate para “i fino’ i taotao tåno siha”, bei na’annok enao na minalago’. Estague i aplikåsion-hu!
———————————————————————-
Malago’ yu’ sumaonao gi FESTPAC komo delegate para i fino’-ta kosaki siña hu ayuda fuma’nu’i i manmamaila’ na guaha lina’la’ gi fino’ Chamoru, lao ti este ha’. I mas didok malago’-hu na para ta fa’nu’i i TAOTAO-TA na guaha lina’la’ gi fino’-ta. Meggaiña gi hinasson-ñiha i taotao-ta na mamåtai i fino’-ta. Ma hahasso na fino’ Chamoru iyon manåmko’ ha’, ya fino’ ingles i magåhet na fino’-ñiha i manhoben siha. Malago’ hu tulaika este siha na klasen hinasso. Malago’ yu’ na i manåmko’ yan i manhoben para u ma na’lå’la’ i fino’-ta. Malago’ hu sohyo’ i taotao-ta para u ma guaiya yan usa i fino’-ta kada diha. Malago’ yu’ na u ma ripåra i taotao-ta na gof takhilo’ i fino’-ta para hita. Taimanu para ta na’lå’la’ i fino’-ta? Siña ta chonnek i fino’-ta mo’na gi FESTPAC. Anggen para u fanmåtto todu este na taotao “Oceania,” i taotao-ta, para u ma li’e’ na i otro taotao Oceania ma tungo’ i fino’-ñiha yan didok i guinaiyan-ñiha nu i fino’–ñiha siha. Ginen este, siña ha’ na para ta gof guaiya i fino’-ta ta’lo.

Taimanu siña hu ayuda hamyo gi FESTPAC? På’go umeskuekuela yu’ gi University of Hawai’i giya Mānoa komo Ph.D student gi Political Science. Hu estutudia i estao i fino’-ta ya taimanu ta na’lå’la’ i fino’ Chamoru giya Guåhan. Gof maolek na gagaige yu’ guini sa’ i taotao Hawai’i, ma na’lålå’la’ i fino’-ñiha. Ma tutuhon iyon-ñiha eskuelan “charter” yan sinipok yan meggai fina’tinas-ñiha komo materiat fina’nå’gue. Put gagaige yu’ guini, siña mafa’nå’gue yu’. Siña hu ayuda hamyo gi FESTPAC lokkue’ sa’ hu tuge’ i yo-ku Master’s Thesis put i nina’lå’lå’-ña i fino’-ta. Ginen este, guaha tiningo’-hu put i fino’-ta yan i karerå-ña i fino’-ta lokkue’ put ihemplo: i tinago’ siha ginen i gobietnon navy, i diniroga i fino’-ta gi eksuela, etc. Siña hu usa todu este i tiningo’-hu gi FESTPAC. Put fin, gof tåhdong i guinaiya-ku nu i fino’-ta på’go. Annai hoben yu’ ti hu tungo’ fino’ Chamoru, lao annai umeskuekuela yu’ gi Unibetsidåt Guåhan, mababa i atadok-hu. Måtto gi hinasso-ku na yanggen måtai i fino’-ta, para ta fanabak. Ginen i fino’-ta, siña ta li’e’ yan siente i hinasson mañaina. Ginen i fino’-ta, manmachalalåni hit. Ayugue na hu disidi na para bai hu eyak Fino’ Chamoru. Para Guåhu, gof impotante i sinesedi-hu komo “second language learner” sa’ meggaiña na para u fan second language learners i taotao-ta lokkue’. Gi este na manera, siña hu ayuda siha gumo’te i fino’-ta.

Ginen este na FESTPAC, gof malago’ hu tungo’ hafa guaguaha gi otro na isla siha giya Oceania. Para Guåhu, gof impotante este sa’ anggen ta tungo’ ha’ hafa guaguaha giya Guåhan yan ti ta tungo’ hafa guaguaha gi otro siha na lugåt, pues ti ta tattittiyi i hinangai-ña FESTPAC. Gi 2014, hu chule’ i yo-ku Master’s degree gi Pacific Islands Studies ya mafa’nå’gue yu’ put i siniseden-ñiha gi isla siha, lao kulan manaitai ha’ yu’. Gi FESTPAC, u guaha opportunidåt para bai hu kuentusi i taotao siha ginen i isla siha. Siña hu usa todu i tiningo’-hu ginen hafa hu taitai ya siña hu chek kao denanche’ i tiningo’-hu yan siña hu chek i hinasson-ñiha put ayu siha na asunto.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s