estoria / fino' chamoru / Uncategorized

Yå’ho i hila’ i famagu’on (Håcha)

Kumåti yu’ nigap, lao hongge yu’ na ti triste yu’ na gof magof yu’. Gi pupuengi nigap, matåtå’chong yu’ gi salan-måmi yan humugågando i hagå-hu gi hilo’ såtge. Para guåhu, tåya’ na’manman ni para u guaha nigap lao, gof lachi yu’. Mientras ume’egga’ yu’ TV, mambaba i hagå-hu un lepblon fino’ Chamoru. Ya-ña humugåndo yan i lepblo todu i tiempo, lao annai ha baba i lepblo nigap, ha li’e’ un litråton neni yan gigon ha li’e’ i litråtu, ilek-ña “neni.” Gigon hu hungok ini, umatalak yu’ yan nina’manman yu’ na ha sångan ini. Fine’na, ti siña hu hongge na ha tungo’ håfa ilelek-ña, yan malago’ hu prueba na ha tungo’ ini. Pues, matå’chong yu’ gi hilo’ såtge gi fi’on-ña yan hu tulaika i pahina para bai hu fanancho litråtu ya para u sangåni yu’ håfa i na’an ni hu tatancho. Gof magof yu’ sa’ ti ha sångan “neni” asta ki hu tulaika i pahina tåtte ya hu tancho i litråton neni. Annai hu tancho ayu, ha tancho i litråtu yan ilek-ña “neni, neni.” Gigon ha sångan ini, tumutuho’ lago’-hu ya ensigidas måtto gi hinasso-ku na siña ta cho’gue ini. Siña ta fa’nå’gue i famagu’on-ta ni fino’-ta.

Annai mapotge i nobiå-hu, manahula ham na para bai in fa’nå’gue i hagan-måmi ni fino’ Chamoru. Kåda in sangåni taotao siha na para bai in che’gue ini, siña hu siente na kulan manchathinanasso siha put ini. Guaha fumaisen ham kao para bai in fa’na’gue gui’ ni fino’ ingles lokkue’. In eppe’ siha na hunggan, lao gi entre guåhu ha’, hu hahasso håfa na kåda taotao fumafaisen ham nu ayu? Anggen hu sangåni siha na para bai in fa’na’gue i hagan-måmi ni fino’ ingles, siempre tåya’ ginaddon-ñiha nu ini. Magåhet na maolekña anggen u ma tungo’ i famagu’on-ta ni meggai fino’ siha lao anggen hu sangåni siha na para bai hu fa’nå’gue i famagu’on ni fino’ Chamoru, kulan ti nahong ini. Håfa na taigueguenao? Håfa siña ta li’e’ gi ini na sinisedi?

Bai hu chonnek ini na hinasso mo’na gi i mamaila’ na tinige’-hu siha.

Advertisements

One thought on “Yå’ho i hila’ i famagu’on (Håcha)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s