fino' chamoru / lepblo

si Derrida gi Fino’ Chamoru

29b35af166b97d4c1bfb4b1de6682bdcacb3bfca67715a27f03d9ec9b455105f

Gi dumangkolu-hu komo scholar, gof pinacha i tintanos-hu ni’ meggai na diferentes na taotao, Chamorro yan ti Chamorro.

Ti bai hu mentiona todu guini,  lao unu na scholar ni’ hu gof agradesi, si Jacques Derrida.

Anai hu fine’nina tumaitai i lepblo-ña siha. Ti ya-hu.

Pot hemplo, gi i lepblo “Of Grammatology” ilek-ña na gi i Sisteman Tiningo’ para i Manwestern todu tiempo maprivilege pat mana’takfo’na i masangan kinu i matuge’.

Ha fa’nu’i gi tinige’ meggai na menhalom na taotao giya Europa na para siha, i gaige, i eppan, i annok i mas impottante yan gaibali.

Para siha, este i masangan, i mali’e’, hafa humuyong ginen i mismo eksperensia, ginen i bos i sumusedi.

Put este na pine’lo, ayu ni’ matuge’ mana’latakpapa’ sa’ lachago’ i sustansia-ña.

Anggen un hungok i taotao sumangan i sinangan-na, mas magahet enlugat di un taitai i sinangan anai matuge’ pat un hungok anai marecord.

I fine’nina anai hu taitai este, ilek-hu, take’ toru!

Anggen un atan i estorian imperialism, i taotao Europa ma fa’ga’ga’ todu i otro taotao siha sa’ ma u’usa i bos ha’ para i tiningo’-ñiha, ya ti manmamange’.

Iyo-ña argument si Derrida, ha fa’titinas gi halom ayu na kuttura. Ya ti ha a’atan na siña umatlibas anggen un atan gi hiyong i chi-ña, anggen un ekstende i inatan-mu para i otro tåno’ siha.

Achokka’ matulaika i siniente-ku put si Derrida, ti hu sosotta este na punto.

Lao hu komprende na guaha otro gaibali gi tinige’-ña siha.

Put hemplo, anai ilek-ña na gi sisteman tiningo’-ñiha mana’takfo’na i bos i taotao kinu hafa i kannai-ña tumuge’, ti ha kekesångan na mismo mas takhilo’ håfa matuge’.

Ha chachanda i “binary” na hinasso ni’ sumasangan na unu mas hihot, mas magåhet kinu i otro.

Put hemplo, mina’lak mas maolek kinu hinemhom. Riku mas maolek kinu popble. Apå’ka mas maolek kinu åttelong.

Todu enao siha manmafa’na’na’an “binary” na hinigua.

Anai ilek-ña si Derrida na gaige i bos taotao gi sanhalom i sisteman tiningo’ giya Europa, ha kekesångan na ayu na pine’lo, put håfa mas maolek gi un binary mismo dumisiside.

Ilek-ña un taotao na anggen ha hungok håfa ilek-mu ya gaige gui’ fi’on-mu anai un sångan, mas klåru, tåya’ chinatkomprende siempre.

Lao gi minagahet, achokka’ gaigaige ha’ gi fi’on-mu, ya ha hungok i sinangan-mu ni’ i mismo talanga’-ña, siña ha chatkomprende hao.

Siña diferentes i kinemprende-ña yan un otro taotao ni’ gaige gi fi’on-ñiha.

Este i punto-ña si Derrida. Todu tiempo, gi todu i lepblo-ña siha, ha kena’klåru este na punto.

Dåkkon ayu na ideha, na anggen mas hihot hao, mas klåru i kinemprende.

Este “the politics of presence and absence.” Gi kada diha na eksprensia-ta, siña ta po’lo na magåhet este. Mas hihot, mas klåru.

Lao ginaige yan tinaigue un otro na binary na hinigua.

Siña un po’lo na unu mas takhilo’, lao gi minagahet i hinigua ti fitme.

Este i hale’ na hinasso para iyo-ña theory put “deconstruction.”

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s